UEFA “Regions’ Cup” 2024-25 do të ngrejë siparin të hënën me ndeshjet e raundit para-eliminator, ku për herë të parë në histori Shqipëria do të marrë pjesë në këtë kompeticion.
Shqipëria ndodhet në grupin A së bashku me Armeninë (Vayk) e Estoninë (Saue JK) dhe nëse kuqezinjtë e mbyllin në vendin e parë do të kalojnë në raundin e ndërmjetëm, ku do të kenë përballë Çekinë, Bosnje Hercegovinën dhe Skocinë.
Të gjitha ndeshjet e raundit para-eliminator të grupit A do të zhvillohen në vendin tonë nën organizimin e FSHF-së. Ndeshjet janë të programuara të luhen të stadiumin “Elbasan Arena”.
Sfida e parë Armeni (Vayk) – Shqipëri do të luhet më datë 20 maj, në orën 17:45. Tre ditë më pas më datë 23 maj po në “Elbasan Arena” do të përballen Estonia (Saue JK) dhe Armenia (Vayk) në orën 17:45. Ndërsa ndeshja e fundit e grupit A Shqipëri – Estoni (Saue JK) do të luhet më 26 maj, në orën 16:00.
Kombëtarja shqiptare në këtë turne të rëndësishëm do të drejtohet nga trajneri Ardian Haçi ndërsa zv.trajner është Igli Mumajesi.
